2017-ին, ինչպես նաեւ հետագա տարիներին համայնքներին տրամադրվող հավասարեցված սուբսիդիաներն այսուհետ կհաշվարկվեն եւ կհատկացվեն 2016-ին տրամադրված ծավալներով, բայց` ոչ ավելի քիչ: Այս մասին ՀՀ Ազգային ժողովում Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի նիստին «Ֆինանսական հավասարեցման մասին» օրենքում փոփոխությունների մասին օրինագծի քննարկման ժամանակ հայտարարեց ՀՀ տարածքային կառավարման եւ ենթակառուցվածքների փոխնախարար Վաչե Տերտերյանը:
Մասնավորապես, փոխնախարարը նշեց, որ նախագիծը որեւէ փոփոխություն չի նախատեսում կառավարության` ֆինանսական հավասարեցման քաղաքականության մեջ:
«Այս ոլորտում իրականացվող քաղաքականությունն ուղղված է համայնքների ֆինանսական հավասարեցմանը եւ դրանց սոցիալ-տնտեսական համաչափ զարգացմանը: Այս նախագծի իրականացումը սուբսիդիաների համաչափ բաշխում կապահովի հանրապետության բոլոր համայնքների միջեւ»,- պարզաբանեց Տերտերյանը:
Այդպիսով, համայնքներին տրվող սուբսիդիաները կարող են կամ ավելացվել կամ կրճատվել, սակայն դրանք, ամեն դեպքում, պետք է բաշխվեն հավասարապես եւ չնվազեն մինչեւ 2016 թվականի մակարդակը:
Քննարկումներից հետո օրենքի նախագիծը դրական եզրակացություն ստացավ մշտական խորհրդարանական հանձնաժողովի կողմից:
