«Սա գույքային հարց է, Եվրոպական կառույցները լռում են շատ ավելի լուրջ խախտումների պարագայում Հայաստանում, ինչ, կարծում եմ, պայմանավորված է, իրենց քաղաքական շահերով»,- ասուլիսում ասաց Սահմանադրական դատարան դիմած Ազգային ժողովի պատգամավորների ներկայացուցիչ, ՀՀ արդարադատության նախկին նախարար, «ԼՈՒՅՍ» հիմնադրամի տնօրեն Դավիթ Հարությունյանը՝ պատասխանելով Panorama.am-ի հարցին՝ Ձեր կարծիքով ինչո՞ւ Եվրոպական կառույցները նախընտրում էին չնկատել, որ ապօրինի գույքի բռնագանձնման մասին օրենքի կիրառումն ակնհայտորեն հակասում է և մարդու իրավունքների պահպանմանն ու պաշտպանությանը, և անգամ Եվրոպական դատարանի նախադեպային իրավունքին։
Նա նշեց, որ դեռևս 2009 կամ 2010 թվականին, երբ Եվրոպայի խորհրդի խորհրդարանական վեհաժողովի փոխնախագահն էր, Եվրոպայի խորհրդում հայտարարություն է արել՝ այս կազմակերպությունն ու նրան կից ինստիտուտները մարդու իրավունքների, ընդհանրապես իրավունքի պաշտպանից դառնում են ավելի շատ շահերի պաշտպանի ինստիտուտի։
«Ոչինչ չի փոխվել անցած 15 տարիների ընթացքում և այդ կառույցները քանի գնում, էլ ավելի են խորանում զուտ աշխարհաքաղաքական շահեր պաշպանելու գործիք դառնալով»,- ասաց նա։
