«Պատվաստումների մասին կեղծ լուրերի տարածումը կարող է երկարացնել կորոնավիրուսի համաճարակը»,- ասել է Microsoft-ի հիմնադիր Բիլ Գեյթսը գերմանական Suddeutsche Zeitung թերթին տված հարցազրույցի ժամանակ:
Ի դեպ, գործարարը կրկին հերքել է համաճարակի մեջ իր ենթադրյալ մասնակցության մասին հրապարակումները.
«Սա մեծ մարտահրավեր է, երբ մարդիկ փնտրում են պարզ լուծումներ: Նրանք մտածում են, թե արդյոք ինչ-որ մեկը կանգնած է համաճարակի հետևում », – ասել է նա:
Միլիարդատերը նշել է, որ իր հիմնադրամն արդեն իսկ բախվել է պատվաստանյութի նկատմամբ մարդկանց անվստահությանը:
«Պակիստանում կամ Նիգերիայում, նման երկրներում պոլիոմիելիտի դեմ պայքարի ընթացքում լուրեր էին պտտվում, որ պատվաստանյութն վտանգավոր է և կանանց մոտ անպտղություն է առաջացնում»,- ավելացրել է Գեյթսը:
Ըստ նրա, նման սխալ պատկերացումների դեմ պայքարելու համար արժե մեծ հեղինակություն ունեցող ազդեցիկ մարդկանց, հասարակության ներկայացուցիչներին կամ կրոնական առաջնորդներին դիմել: Գեյթսի կարծիքով՝ միայն նրանք են կարողանում բնակչությանը բացատրել պատվաստանյութի օգտակարությունը:
Հիշեցնենք, որ կորոնավիրուսի բռնկումից ի վեր սոցիալական ցանցերում և առցանց լրատվամիջոցներում տեսություններ են շրջանառվում համաճարակի մեջ միլիարդատիրոջ ենթադրյալ մասնակցության մասին: Որոշ պորտալներ և վեբ-ցանցեր գրել են, որ իբր Գեյթսը երկրագնդի բնակչության թիվն է պակասեցնում պատվաստումների միջոցով՝ գլոբալ հսկողության համար: Գեյթսը շեշտել է, որ դավադրության մեջ իր ներգրավվածության շուրջ տեսությունները չափազանց հիմար են՝ լուրջ պատասխանելու համար:
