Այսօր՝ մայիսի 14-ին, Երևանի ավագանու ընտրություններին վարչապետ Կարեն Կարապետյանը քվեարկության էր եկել կնոջ ուղեկցությամբ:
Նշենք, որ Կարեն Կարապետյանը քվեարկել է թիվ 4/53 ընտրական տեղամասում: Քվեարկությունից առաջ հանձնաժողովի անդամները վարդեր նվիրեցին վարչապետի կնոջը:
Հիշեցնենք, որ մայիսի 14-ին Երևանում տեղի են ունենում ավագանու ընտրություններ, ընտրություններին մասնակցում է երեք քաղաքական ուժ։
«Ելք» դաշինքի ցուցակը գլխավորում է ԱԺ պատգամավոր Նիկոլ Փաշինյանը, նրան հաջորդում են Արայիկ Հարությունյանն ու Դավիթ Խաժակյանը։
«Երկիր ծիրանի» կուսակցության ցուցակի առաջատարը Զարուհի Փոստանջյանն է։ Երկրորդ համարը Մնացական Պարակշիեւն է, իսկ երրորդը՝ Սոնա Աղեկյանը։
Հայաստանի հանրապետական կուսակցությունից քաղաքապետի թեկնածուն գործող քաղաքապետ Տարոն Մարգարյանն է։ Ցուցակի առաջին եռյակում են շախմատիստ Սմբատ Լպուտյանն ու ծրագրավորող, «Սինոփսիս» ընկերության տնօրեն Հովիկ Մուսայելյանը։
Ավագանու անդամների թիվը 65 է: Քաղաքական ուժերի ցուցակները գլխավորողները համարվում են քաղաքապետի թեկնածուներ:
