Վայոց Ձորում դպրոցի զինղեկը Dodge-ով բախվել է ժայռաբեկորին և կողաշրջվել, ավտոմեքենան վերածվել է մոխրակույտի

Վայոց ձորի մարզում, այսօր՝ մարտի 2-ին, ավտովթար-հրդեհ է տեղի ունեցել. ժամը 13։40-ի սահմաններում Երևանի բնակիչ՝ 47-ամյա Կարեն Գասպարյանը իր վարած Dodge Challenger մակնիշի ավտոմեքենայով Երևան -Երասխ-Մեղրի ավտոճանապարհի 111.7 կմ հատվածում դուրս է եկել դեպի ձախ, բախվել ժայռին և կողաշրջվել։

Ֆոտոլրագրող Գագիկ Շամշյանի հաղորդմամբ, բախման հետևանքով ավտոմեքենայում հրդեհ է բռնկվել։

Ըստ նախնական տեղեկությունների՝ բարեբախտաբար, տուժածներ չկան։ Մինչ հրշեջ փրկարարների ժամանումը, քաղաքացիները ավտոմեքենան դարձի են բերել և վարորդին ու 2 ուղևորներին դուրս բերել ավտոմեքենայից։

Հրդեհը մեկուսացվել է, սակայն ավտոմեքենան ամբողջովին վերածվել է մոխրակույտի։