Իրանի «Իսլամական հեղափոխության պահապանների կորպուսի» հրամանատար, գեներալ-մայոր Հոսեյն Սալամին հայտարարել է, որ նախազգուշացում է տրվել Ադրբեջանին և Հայաստանին ԼՂ հակամարտության էսկալացիայի ֆոնին Իրանի հետ սահմանային շրջանում ահաբեկիչների ներկայության հարցով:
Ինչպես փոխանցում է «Թանսիմ» գործակալությունը, գեներալ-մայոր Սալամին հինգշաբթի այցելել է Իրանի հյուսիսարևմտյան սահման Արդաբիլի նահանգում, որը մոտ է այն շրջաններին, որտեղ վերջին շաբաթներին մարտեր են ընթանում:
Հրամանատարն ասել է, որ սահմանային գոտի է այցելել՝ համոզվելու, որ Իրանի սահմանային շրջանի բնակիչները գտնվում են լիարժեք անվտանգության մեջ:
Սահմանապահների խմբի հետ հանդիպումից հետո վերջինս հայտարարել է, որ Իրանի զինված ուժերն ամբողջությամբ պատրաստ են՝ պաշտպանելու երկիրը բոլոր հանգամանքներում և «վճռական պատասխան» կտան ցանկացած ագրեսիայի:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 46 քաղաքացիական անձ, վիրավորվել է 144 քաղաքացիական անձ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։
