Երևանի սրտում տոնական տրամադրություն է: 2800-ամյա քաղաքը վայելում է իրեն սիրող ու գնահատող ժողովրդի ներկայությունը: Այսօր ամեն քայլափոխի փողոցներում կարել է հանդիպել հայտնի մարդկանց, պաշտոնյաների, ովքեր իրենց անմասն են համարում Երևանից:
Երևանի ավագանու նախկին անդամ Անահիտ Բախշյանը ևս իր թոռնիկների հետ շրջում է Երևանի փողոցներով և վայելում տոնական տրամադրությունը:
ArmDay.am-ի հետ զրույցում տիկին Բախշյանն ասաց, որ շատ բարձր տրամադրություն ունի և քաղաքում տիրող տոնական աղմուկն էլ տոնի ցուցանիշ համարեց:
Մինչ մենք զրուցում էինք, Ա. Բախշյանին աջ ու ձախ խնդրում էին՝ լուսանկարվել: Այս առիթով նա կատակով ասաց. «Այսօրվա աստղն էլ ես եմ»:
Անդրադառնալով տոնական ցուցատախտակների վրա գրված «Հայկական Երևան» արտահայտությանը, որը քննարկումների առիթ է դարձել, ավագանու նախկին անդամը պատասխանեց.
«Ճաշակին ընկեր չկա: Ես դրան այնքան էլ ուշադրություն չեմ դարձնում: Երևանը ինչ կերպ կարող լինել, եթե ոչ հայկական: Առանձնապես տարբերակելու կարիք չկա, բայց երևի փորձել են հիշեցնել, որ Երևանը որրոշ մարդկանց հոր տունը չէ, որ ոնց ուզեն ձևեն, քանդեն ու փոխեն:
Տիկին Բախշյանը նշեց, որ Երևանն իր համար առանձնահատուկ է իր ժողովրդով:
Այն հարցին, թե հնարավո՞ր է մի օր Երևանը դառնա աշխարհի մայրաքաղաք, նա պատասխանեց.
«Չէ, պետք չէ, մերը թող մեզ մնա: Երևանը թող մնա Հայաստանի մայրաքաղաքը»:
Վերջում տիկին Բախշյանն իր շնորհավորանք ու մաղթանքը հղեց տոնի առթիվ:
«Ես ջերմորեն շնորհավորում եմ բոլորին Երևանի տոնի առթիվ: Հայ ազգին, երևանցուն մաղթում եմ, որ արժանի լինեն այն Երևանին, որի մասին երազում ենք: Ունենալով այսպիսի հրաշք՝ երազում ենք ավելի մաքուր, տրանսպորտային լավ միջոցներով, հավասար հնարավորություններով, առողջ ու ուրախ Երևանի մասին»:
