«Այս իշխանությունները կուզեն փորձել Հայաստանի մեր հայրենակիցներին ցույց տալ, որ արցախցու կռիվը ոչ թե հայրենիքի կռիվ է, այլ փորի, ինչպես իրենք են սիրում ասել»,- լրագրողներին ասաց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանը, ով կառավարության մոտ մասնակցում է արցախցիների ինքնաբուխ հավաքին։
Հիշեցնենք, որ ՀՀ կառավարությունից հրավիրել են Արցախցիների իրավունքների պաշտպանության խորհրդի ներկայացուցիչներին՝ այսօր հանդիպելու փոխվարչապետ Տիգրան Խաչատրյանի հետ և քննարկելու մեր պահանջները: Մինչև կառավարությունում կանցկացվի հանդիպում, արցախիցներն ինքնաբուխ հավաքվել են կառավարության մոտ՝ հանրայնորեն վերահաստատելու իրենց պահանջները:
Մ. Հակոբյանը վստահեցրեց, որ անկախ Հայաստանի կառավարության որոշումից՝ այն պահանջները, որոնք դրվել են Ազատության հրապարակում մարտի 29-ին, այդ պահանջների հետևից իրենք անդադար գնալու են, որևէ կերպ որևէ պահանջում չեն զիջելու։
«Իսկ գլխավոր պահանջը կարմիր գծով գնում է՝ այս իշխանությունները պարտավոր են արժանապատիվ կեցության հնարավորություն ապահովել մեր 160 հազար հայրենակիցներին, մինչև իրենք կզբաղվեն մեր հավաքական վերադարձով։
Եթե պատասխանը դրական է շատ լավ, եթե ոչ՝ ուրեմն դրանից բխող քայլեր կլինեն։
Մեկուկես տարի է ասում ենք՝ մեր կռիվը փորի կռիվ չէ, փորի կռիվն իրենցն է եղել, շարունակում են կեղեքել, զավթել, լափել։ Մեր կռիվը մեր հայրենիք վերադառնալու մասին է»,- ասաց Մ. Հակոբյանը։
