Այսօր համագործակցության հուշագիր ստորագրվեց «Գագիկ Ծառուկյան» բարեգործական հիմնադրամի և «Ֆիլմարտադրողների համահայկական Ֆեդերացիա» ՀԿ միջև։
Կինոռեժիսոր Հովհաննես Գալստյանը նշեց, որ համագործակցության հուշագրի նպատակն է աջակցել հայ ռեժիսորների ֆիլմերի վաճառքին և փառատոնային տարածմանը, նոր սկսվող ֆիլմերի զարգացմանը, արտադրության մեջ գտնվող ֆիլմերի համար գործընկերներ գտնելուն, կինոարդյունաբերության մեջ էական դերակատարում ունեցող հայաստանյան և սփյուռքահայ կինոգործիչների միջև կապերի ամրապնդմանը, Հայաստանի գրավիչ իմիջի շեշտակի ավելացմանը՝ քրիստոնեության բնօրրան երկիրը որպես ֆիլմերի նկարահանումների, ճամփորդության և տուրիզմի համար նոր ու զարմանահրաշ տարածք ներկայացնելու եղանակով։
Համագործակցության հուշագրի շրջանակներում իրականացվող առաջին ծրագիրը կհանդիսանա «Գագիկ Ծառուկյան» հիմնադրամի կողմից 2025թ-ի մայիս 13-21-ը Կաննի (Ֆրանսիա) միջազգային կինոփառատոնի շրջանակներում անցկացվող կինոշուկայում «Ֆիլմարտադրողների Համահայկական Ֆեդերացիա» ՀԿ տաղավարի գլխավոր հովանավորչությունը։
«Առաջին անգամ ֆեդերացիան Կաննում կունենա տաղավար։ Առաջին անգամն է, որ Հայաստանը Կաննում ներկայացված կլինի 2 տաղավարով և սա խոսում է Հայաստանում կինոարտադրության զարգացման առաջին նշույլների մասին։ Երբ հաջողակ մարդիկ աջակցում են ծրագրին, սա, իհարկե, շատ լավ բան է, բայց ամենակարևորն այն է, որ հաջողակ մարդիկ վատ ծրագրերի չեն աջակցում։ Եվ եթե մենք ունենք նման հովհանավոր, ուրեմն մենք բոլորշանսերն ունենք հայկական կինոն առաջ տանելու, զարգացնելու համար։ Եվս մեկ անգամ շնորհակալություն եմ հայտնում «Գագիկ Ծառուկյան» հիմնադրամին»,-ավելացրեց նա՝ նշելով, որ այս համագործակցության արդունքում կստեղծվեն նոր լավ ու որակյալ ֆիլմեր։
Գագիկ Ծառուկյանի մամուլի խոսնակ Իվետա Տոնոյանն էլ ասաց, որ այս համագործակցությունը «Գագիկ Ծառուկյան» հիմնադրամի համար ևս խորհրդանշական կարևորություն ունի.«Գործունեության 30 տարվա ընթացքում « Գագիկ Ծառուկյան» բարեգործական հիմնադրամը մշակութային հարյուրավոր ծրագրեր է իրականացրել։ Կինոյի զարգացմանը միտված այս համագործակցությունը մեզ համար ևս հետաքրքիր փորձառություն է, ինչին վերաբերվում ենք ամենայն պատասխանատվությամբ։ Մշակույթն այն եզակի ոլորտներից մեկն է, որն ամբողջ աշխարհին ներկայանալի է դարձնում մեր պետությունը, և այդտեղ ձեռք բերված մեր հաղթանակները հպարտության առիթ են տալիս։ Պարոն Ծառուկյանն արդեն հնարավորություն ունեցել է այս մասին խոսելու, բայց ևս մեկ անգամ կրկնեմ, որ մենք ունենք բոլոր հնարավորություններն աշխարհին լավագույնս ներկայանալու։ Վերջին տարիներին տարբեր ոլորտներում տիրող այս խեղճությունը մեզ համար չէ։ Մենք մշտապես ամբողջ աշխարհին ասելիք ենք ունեցել»։
