«Հրապարակ» օրաթերթը գրում է․ Գյումրիի մեր աղբյուրները մեզ բացատրեցին, թե ինչ է կատարվել երեկ հանրապետության երկրոր քաղաքում և ինչու են Սամվել Բալասանյանի որդու` Խաչատուր Բալասանյանի խափանման միջոցն անսպասելիորեն փոխել:
Բանն այն է, որ ճնշումների ազդեցության տակ հրաժարական են տվել և Գյումրիի քաղաքապետը և ողջ թիմը: Իսկ միակ փոխքաղաքապետ Սուրեն Ջանոյանը, որին օրենքով կարող էին քաղաքապետի ժամանակավոր պաշտոնակատար նշանակել, հետապնդվում է և գտնվում է տնային կալանքի մեջ, այսինքն նրան իրավունք չունեն ԺՊ նշանակել: Իսկ քաղաքը կառավարել` աշխատավարձ տալ, աղբահանություն և այլ խնդիրներ լուծել կարող է միայն քաղաքապետի ԺՊ-ն: Միայն նա կարող է հայտարարել և կազմակերպել ՏԻՄ ընտրությունների մասին:
Վերջին օրերին, երբ տգետ ՔՊ-ականները հանկարծ հասկացել են սա, արդեն ուշ է եղել` քաղաքը մնացել է անգլուխ և իրավական լուծում, ըստ էության, չկա: Ելքեր փնտրելու ճանապարհին որոշել են իրենց որոշումից` փոխքաղաքապետի նկատմամբ տնային կալանքից հրաժարվեն: Վերջինս վերադառնա քաղաքապետարան, նշանակվի Գյումրիի քաղաքապետի ԺՊ և իրականացնի ՔՊ- ի ծրագիրը` հրամաններ տա, ընտրություններ հայտարարի և այլն: Սակայն Սուրեն Ջանոյանը, ի պատիվ իրեն, հրաժարվել է` ասելով, որ հենց վերականգնեն իրեն, դիմում է գրելու հրաժարականի, ՔՊ-ի նենգ ծրագիրը չի կատարելու:
Եվ Նիկոլ Փաշինյանն ու իր իրավապահները գործի են դրել փորձված մեթոդը` Խաչատուր Բալասանյանին կալանավորել են, որ Սամվել Բալասանյանը ճնշում գործադրի, համոզի, խնդրի Ջանոյանին` համաձայնել և իշխանության ծրագիրն իրականացնել: Առաջիկա օրերին կերևա` կկարողանա՞ն կոտրել Բալասանյանին ու Ջանոյանին և «լուծել» Գյումրիի ճգնաժամը:
Ավելին՝ օրաթերթի այսօրվա համարում։
