Կալանավորված եմ Արցախին, Ռուսաստանին աջակցելու համար, հասնելու ենք մեր Հայրենիքի ազատագրմանը թուրք դավաճաններից․Միկա Բադալյան

MediaHub.am-ը զրուցել է «Արմավիր» ՔԿՀ –ում գտնվող Միկա Բադալյանի հետ։ Միկա Բադալյանը կարծում է , որ ինքը քաղաքական հետապնդման է ենթարկվում  Հայաստանին, Արցախին և Ռուսաստանին աջակցելու համար  և հանուն հայրենիքի պատրաստ է բանտում մնալ, չնայած նրան, որ ապօրինի է կալանավորվել։

- Պարոն Բադալյան, Դուք մայիսից գտնվում եք կալանքի տակ, չնայած նրան, որ Ձեզ առաջադրված մեղադրանքը ՀՀ նոր քրեական օրենսգրքի՝ ուժի մեջ մտնելու կապակցությամբ այլևս գոյություն չունի։ Դուք պնդում եք, որ քաղաքական հետապնդման եք ենթարկվում, այդպիսի պնդման հիմքերը, որո՞նք են։

-Այն, որ ես դեռ հետապնդվում եմ՝ չնայած քրեական օրենսգրքի փոփոխությանը, և այն, որ չկա հոդված, որով փորձում են ինձ դատապարտել, իմ գործի քաղաքական լինելու հերթական ապացույցներից մեկն է։ Հիշեցնեմ, որ իմ դեմ քրեական գործը հարուցվել էր ապրիլի վերջին, իսկ ապրիլի 22-ին տեղի ունեցավ իմ ցուցադրական ձերբակալությունը, որտեղ, ի դեպ, ոստիկանությունը ցույց տվեց իր «բարձր»  պրոֆեսիոնալիզմը։ Փորձեցին ինձ թաքուն առևանգել, բայց չստացվեց, և ես կարծում եմ, որ դուք լավ գիտեք դրան հաջորդած ողջ ամոթը։ Հարց է առաջանում՝ ինչո՞ւ չեք կարող օրենքով սահմանված կարգով ծանուցագիր ուղարկել ու օրենքով կանչել։ Բանն այն է, որ ապրիլի 21-ին ընկերներիս հետ ցրել ենք հայրենիքի դավաճան Խզմալյանի գլխավորած հակառուսական ցույցը։ Այն ժամանակ դատարանի վրա ճնշում չկար, և իմ կալանավորումը մերժեցին, բայց երբ մենք ցրեցինք տհասների հերթական շքերթը, լավ, ավելի կոնկրետ՝ հակառուսական ցույցը Երևանում, ես կալանավորվեցի և դեռ անազատության մեջ եմ։ Սա պատահականությո՞ւն է։ Հարցը, իհարկե, հռետորական է:

-Հնարավոր ահաբեկչության մասին Ձեր տելեգրամյան ալիքում վերացական եք գրել, թե կոնկրետ տեղեկատվության եք տիրապետել, արդյոք քրեական գործ հարուցելուց առաջ և հետո բազմակողմանի քննություն իրականացվե՞լ է Ձեր գրառման իսկությունը ստուգելու ուղղությամբ։

-Այն ժամանակ ես հավաստի տեղեկություններ ունեի, որ Փաշինյանը ողջ ուժով փորձում էր հետաձգել իր՝ Մոսկվա մեկնելը, և եթե Մոսկվան ընդհանրապես դեմ չէր, ապա Բրյուսելում տեղի ունեցած հանդիպումից հետո իրավիճակը կտրուկ փոխվեց։ Այդ պահից դիվանագիտական ճանապարհով այլեւս հնարավոր չէր հետաձգել հանդիպումը։ Զուգահեռաբար, լուրեր էին պտտվում, որ «Սասնա ծռեր» ահաբեկչական կազմակերպությանը զենք են տրամադրել՝ ահաբեկչություններ իրականացնելու համար ու այստեղ արդեն փազլը հավաքվեց:

Այդ գրառումը գրելուց արդեն մեկ ժամ անց իմ հետևից «եկան» ԱԱԾ-ից, որտեղ, մեկ այլ զուգադիպությամբ, այդ օրը նշանակվեց նոր վարչության պետ: Ենթադրում եմ, որ ես նրա առաջին պատվերն էի նոր աշխատավայրում։ Այստեղ արդեն իրենց «պրոֆեսիոնալիզմը» դրսևորեցին ԱԱԾ աշխատակիցները, ովքեր, առանց քննչական գործողությունների, սպասեցին Փաշինյանի հանդիպմանը Մոսկվայում, ապա քրեական գործ հարուցեցին: Իմ պաշտպան Էրիկ Ալեքսանյանը, որը փայլուն փաստաբան է ու վճռական հայրենասեր, պնդում է, որ իմ գրառումից հետո Սասնա ծռերը որոշել են ահաբեկչություններ չկատարել. ԱԱԾ-ն հակառակը չի կարող ապացուցել, քանի որ քննչական գործողություններ չեն կատարվել, ինչը նշանակում է, որ ոչ միայն իմ կալանավորումը, այլ նաեւ՝ իմ դեմ քրեական գործ հարուցելն է անօրինական։ ԱԱԾ-ն իսկապես ցույց տվեց իր մակարդակը, ավելի ճիշտ՝ բացակայությունը։ Հենց այս պատճառով է, որ դատախազները ամեն հնարավոր և անհնարին եղանակներով փորձում են կանխել բաց դատավարությունը, քանի որ այնտեղ ջախջախիչ պարտություն են կրելու։ Այս գործը խայտառակություն է լինելու ԱԱԾ-ի, Գլխավոր դատախազության և Քննչական կոմիտեի համար։

-Ձեզ այսքան ժամանակ կալանքի տակ պահելը հնարավոր համարո՞ւմ եք, որ կապ ունենա Ձեր կողմից ընդդիմության հավաքներին մասնակցելու հետ, ինչպես նաև Ձեր տելեգրամյան ալիքում պարբերաբար Արցախի և ՀՀ–ի սահմանային իրավիճակը, Ադրբեջանի գործողությունները ներկայացնելու հետ։ 

-Միանշանակ, բոլորը գիտեն իմ կատեգորիկ դիրքորոշումը իշխանությունների նկատմամբ, և չնայած այն հանգամանքին, որ 2021 թվականի ընտրություններից հետո ես բազմիցս քննադատել եմ խորհրդարանական ընդդիմությանը, հենց առաջին օրվանից կանգնեցի ընդդիմության կողքին, երբ սկսվեցին փողոցային բողոքի ակցիաները իշխանությունների դեմ: Դա տեղի ունեցավ ապրիլի 17-ին, երբ Արթուր Վանեցյանը անժամկետ բողոքի ակցիայով գնաց Ազատության հրապարակ։ Իմ տելեգրամյան ալիքը գնալով ավելի մեծ ժողովրդականություն է ձեռք բերում՝ լինելով ամենաշատ մեջբերվող հեղինակային ալիքը ոչ միայն Հայաստանում, այլև ողջ Հարավային Կովկասում, իմ նյութերն ու ռեպորտաժները շատ հաճախ վերցվում են ռուսական խոշորագույն տելեգրամյան ալիքների և լրատվամիջոցների կողմից, ինչը թույլ է տալիս ինձ՝ փոխանցել իրական տեղեկատվություն և իրավիճակը Հայաստանում: Դա, իհարկե, իշխանություններին, մեղմ ասած, դուր չի գալիս։ Ինչպես իրենց դուր չի գալիս, երբ ես պատմում ու ցույց եմ տալիս մեր դիրքերի ու Արցախի իրական վիճակը։ Իշխանությունները սովոր չեն, որ մարդկանց հասնում է այն, ինչ կա, այլ ոչ թե այն՝ ինչ պետք է: Այդ իսկ պատճառով իմ առաջին ձերբակալման ժամանակ այս գործով խնդիր է դրվել գողանալ հեռախոսս և ջնջել տելեգրամյան ալիքը։ Այս առաջադրանքը կատարելու համար 40-50 կարմիր բերետավորներ ծեծկռտուք կազմակերպեցին Ազատության հրապարակում և գողացան իմ հեռախոսը: Բայց մի մոռացեք ոստիկանության «բարձր» մակարդակի մասին, ինչպես բոլորդ գիտեք, ալիքը ոչ միայն կա, այլ նաև բարգավաճում է, չնայած այն բանին, որ ես այս պահին հասանելիություն չունեմ: Ի դեպ, անդրադառնանք քննչական կոմիտեին. դուք գիտե՞ք մեղադրանքի հիմքերից մեկը, ինչո՞ւ պետք է կալանքի տակ լինեմ։ Լինելով ազատության մեջ՝ ես կարող եմ ջնջել կամ փոխել հենց գրառումը, և նրանց մտքով անգամ չի անցնում, որ ալիքը շարունակում է իր ակտիվ աշխատանքը, և կարող եք ցանկացած վայրկյան ջնջել այս գրառումը։ Քանի որ սկսել ենք խոսել տարբեր ծառայությունների, մասնագիտական որակների մասին, դատավոր Շիրոյանի կողքով չի կարելի անցնել։ Գիտե՞ք՝ ինչով է պայմանավորված կալանքս երկարաձգելը: Լինելով ազատության մեջ՝ կրկին կարող եմ նման անօրինական արարք կատարել: Այս որոշումը թողնեմ առանց մեկնաբանության, պարկեշտության շրջանակներում այն այլ կերպ կընկալվի։

-Դուք, որպես հասարակական գործիչ, մշտապես խոսել եք հայ-ռուսական հարաբերությունների ամրապնդման անհրաժեշտության մասին, փորձել եք պրոռուսական տրամադրություններ ստեղծել։ Ձեր պաշտպանները պնդում են, որ Ձեզ այսքան ժամանակ կալանքի տակ պահելը վնասում է նաև հայ-ռուսական հարաբերություններին։ Դուք ի՞նչ կարող եք ասել այս մասով։ 

-Ես միշտ հանդես եմ եկել և կպաշտպանեմ հայ-ռուսական բարեկամության ամրապնդումը։ Ռուսաստանը մեր ռազմավարական դաշնակիցն է և, իմ կարծիքով, մեր սահմաններում կայունության և Հայաստանի ու Արցախի ներսում բարգավաճման միակ ճանապարհը։ Ինձ հաճախ անվանում են ռուսամետ ակտիվիստ, բայց ես, առաջին հերթին, հայամետ ակտիվիստ եմ և միշտ աջակցելու եմ մեր ռազմավարական դաշնակցին, հատկապես դա պետք է դրսևորվի այն ժամանակ, երբ աշխարհի կեսը զենք է բարձրացրել նրանց դեմ։ Դիտեք հակառուսական ակցիաները ցրելու մեր գործողությունների տեսանյութերը, նրանք միլիոնավոր դիտումներ են հավաքել և տասնյակ հազարավոր մեկնաբանություններ, որոնցում հայերին գովաբանում են իրենց դիրքորոշման համար։ Կառավարությունը ամեն կերպ խթանում է հակառուսական տրամադրությունները հասարակության մեջ, ինձ համար սա անընդունելի է, դրա համար էլ ես այստեղ եմ: Իմ կալանավորումը, իհարկե, հարված է նաև Ռուսաստանին, բայց ավելի մեծ չափով ցուցադրական պատիժ Ռուսաստանին աջակցելու համար, ինչ էլ որ դա լիներ մյուսների համար։ Այս հիմարները չեն հասկանում, որ ես ամեն ինչ անում եմ հանուն Հայաստանի և Արցախի։ Եթե ես պետք է նստեմ հանուն հայրենիքի, ես կնստեմ, դու ինձ դրանով չես վախեցնի։

-ՔԿՀ-ում ինչպիսի՞ պայմաններ են, Ձեր առողջական վիճակի հետ կապված որևէ խնդիր առաջացել է, գանգատներ ունե՞ք։

-Դե բանտը ամեն դեպքում բանտ է, բայց ընդհանրապես չեմ բողոքում: Ես գիտեմ, թե ինչի համար եմ այստեղ, և դա ամենակարևորն է: Այստեղ ինձ լավ են վերաբերվում և՛ բանտարկյալները, և՛ վարչակազմը: Ընդհանուր առմամբ, պետք է ասեմ, որ պայմանները միանգամայն տանելի են: Այն տեղեկությունը, որ տարածվել է ֆեյսբուքում, թե իբր ծեծի եմ ենթարկվել, չի համապատասխանում իրականությանը եւ էժանագին սադրանք է իշխանությունների կողմից։ Բայց այստեղ ես հանդիպեցի շատ լավ մարդկանց, իմացա իշխանությունների և ոստիկանության ապօրինությունների բազմաթիվ դեպքեր: Ես անպայման կհրապարակեմ այս բոլոր դեպքերը, հենց որ ազատ լինեմ։ Նրանք դեռ չեն հասկանում, թե ինչ սխալ են արել. ինձ այստեղ  բերելով՝ իրենց փոսն են փորել:

-Բանտում հանդիպել եք  պրոդյուսեր Արմեն Գրիգորյանին, եթե այո, ապա այն ժամանակ նա իրեն ինչպես էր զգում, ինչ էր ասում։

-Բանտում մնալու առաջին օրվանից Արմենի կողքի խցում էի, կարանտինում պատուհանից զրուցում էինք դեպի բակ, գոռում իրար՝ ես 8-րդ խցում էի, Արմենը՝ 7-ում, Գերասիմ Վարդանյանը՝ 6-րդ խցում. Երկուսն էլ մենակ էին նստած, ես ավելի բախտավոր էի, բայց մեր շփումը գերազանց էր, և քանի որ մեզանից միայն ես կարող էի զանգել, լուրեր էի ստանում ու կիսվում տղաների հետ պատուհանի միջով: Երբ մեզ տեղափոխեցին շենք, նորից հայտնվեցինք հարևան խցերում, միասին զբոսանքի հնարավորություն ունեինք, որը տևում էր մեկ ժամ ու այդ ընթացքում հանգիստ զրուցում էինք: Մենք դա սիրով էինք անում, քանի որ մեր տեսակետները շատ առումներով համընկնում էին, շատ բաներ էինք քննարկում ու ծրագրում։ Ինչ վերաբերում է նրա ֆիզիկական և հոգեբանական վիճակին, այստեղ գրեթե բոլորը կարող էին նախանձել նրան։ Չեմ կատակում՝ այստեղ նա իրեն շատ ավելի լավ էր զգում, քան վայրի բնության մեջ։ 25 տարվա մեջ առաջին անգամ սկսել էր վարժություններ ու մարզանքներ անել: Պարանոցի ու մեջքի ցավերն անցել էին, որոնք երկար տարիներ տանջում էին նրան: Ես ամեն անգամ զարմանում էի, բայց նա իսկապես ծաղկում էր։ Արմեն Գրիգորյանին սպանել են, իսկ մեղավորները կպատժվեն: 

-Հիմա, լինելով բանտում, ինչ-որ բան կփոխեի՞ք ձեր գործողություններում։ Ի՞նչ պլաններ ունեք ազատությունից հետո, ընդմիջում կվերցնե՞ք, կմեղմե՞ք Ձեր դիրքերը։ Ինչ-որ բան կփոխե՞ք։ 

-Կարծում եմ՝ այո, անմիջապես շորտերով ու հողաթափերով կգայի դատարան, որպեսզի հետո չփոխեի: Ինչ վերաբերում է իմ ծրագրերին, ապա դրանք բոլորը կապված են բացառապես դավաճանների դեմ պայքարի հետ։ Վստահեցնում եմ, որ ես կշարունակեմ պայքարել և իմ պայքարը կդառնա ավելի կոշտ, ինչ էլ որ արժենա ինձ համար: Ես պնդում եմ, որ երկրում կոնսենսուս կա Նիկոլի գնալու մասով։ Ինչո՞ւ ընդդիմությանը դա չհաջողվեց։ Ես իմ մտքերն ունեմ սրա վերաբերյալ, առայժմ կարծում եմ, որ այս թեման չպետք է զարգացնել։ Մենք՝ հայերս, այլեւս թույլ չենք տա, հասնելու ենք մեր հայրենիքի ազատագրմանը թուրք դավաճաններից։ 
Քանի որ կալանավորվել եմ Արցախին և Ռուսաստանին աջակցելու համար, չեմ կարող չավելացնել մի քանի շատ կարևոր բառ՝ 

Արցախը – Հայկական

Դոնբասը – Ռուսական

Ղրիմը – մերն են!!!

Անի Գևորգյան