Ֆինլանդիայի Ռովանիեմի քաղաքում ընթացող ծանրամարտի Մ23 Եվրոպայի առաջնությունում տղամարդկանց 81 կգ քաշայինների պայքարում Հայաստանի ներկայացուցիչ Ռաֆիկ Հարությունյանը հրում վարժության մեկ մոտեցումով նվաճեց չեմպիոնի կոչումը՝ երկամարտում գրանցելով 345 կգ (155+190):
Պոկում վարժությունը Ռաֆիկ Հարությունյանի համար հաջող չդասավորվեց: Առաջին մոտեցմամբ նա բարձրացրեց 150 կգ, ապա 155 կգ: 160 կգ-ի երրորց մոտեցումը Հայաստանի ներկայացուցիչը ձախողեց եւ այս վարժությունում պայքարն ավարտեց 4-րդ տեղով:Հրում վարժությունում Ռաֆիկ Հարությունյանն ամենավերջինը դուրս եկավ մրցահարթակ, երբ բոլոր մասնակիցներն ավարտել էին իրենց ելույթները: Հայաստանի թիմի մարզիչները Ռաֆիկ Հարությունյանի համար պատվիրել էին ամենածանր քաշը՝ 190 կգ:
21-ամյա ծանրորդը առաջին մոտեցմամբ հրեց 190 կգ-ոց ծանրաձողը եւ շրջանցեց բոլոր մրցակիցներին՝ ապահովելով չեմպիոնի տիտղոսը: Երկրորդ եւ երրորդ մոտեցումներից ծանրորդն ու մարզիչները հրաժարվեցին: Հարությունյանը նվաճեց նաեւ այս վարժության փոքր ոսկե մեդալ:
Ռաֆիկ Հարությունյանը պատանիների Եվրոպայի արծաթե մեդալակիր է, երիտասարդների Եվրոպայի արծաթե մեդալակիր, երիտասարդների աշխարհի բրոնզե մեդալակիր, Եվրոպայի մինչեւ 20 տարեկանների առաջնության բրոնզե մեդալակիր:
2021 թվականի ապրիլին Մոսկվայում տեղի ունեցած ծանրամարտի մեծահասակների Եվրոպայի առաջնությունում 81 կգ քաշայինների պայքարում զբաղեցրեց 4-րդ տեղը (346 կգ, 150+196): Հրում վարժությունում բարձրացրած 196 կգ-ի շնորհիվ հայ մարզիկն արժանացավ փոքր բրոնզե մեդալի։ Իսկ 2019 թվականի Բաթումիի Եվրոպայի առաջնությունում հրում վարժությունում 194 կգ արդյունքով սահմանել էր երիտասարդների ռեկորդ:
