Հայաստանում տնտեսական անկումը կկազմի ավելի քան 10%, պետական պարտքի չափը կգերազանցի 9 միլիարդ դոլարը: Այս մասին փետրվարի 4-ին NEWS.am-ին տված հարցազրույցում ասաց տնտեսագետ Վարդան Բոստանջյանը:
Նա պարզաբանեց, որ տնտեսությունը հետընթաց է ապրում, եւ այս իրավիճակում դրական միտումներ նկարագրելը բավականին բարդ է:
«Չեմ կիսում Հայաստանի ֆինանսների նախարարի կանխատեսումները 3,2% մակարդակով տնտեսական աճի վերաբերյալ: Նման համարձակ կանխատեսումներ կարելի է անել միայն նախորդ օրվա համեմատությամբ կամ, օրինակ, հասարակությանը մոլորության մեջ գցելու նպատակով: Երկրում տնտեսական իրավիճակն այսօր զարգացման նույնիսկ չնչին նշաններ ցույց չի տալիս»,- ասաց Բոստանջյանը:
Փորձագետը վստահություն հայտնեց, որ, ընդհակառակը, անկում է լինելու, եւ դա կապված է համավարակի եւ պատերազմի բացասական հետեւանքների հետ, որոնք հանգեցրել են տնտեսական գործունեության սահմանափակումների:
«Առանց այդ էլ մեր շրջանառությունը մեծ չէր: Իրավիճակը բարդանում է պետական կառավարման համակարգի չափազանց ցածր արդյունավետությամբ: Այս ամենը կհանգեցնի նրան, որ Հայաստանում կարող են տնտեսական անկման երկնիշ ցուցանիշներ գրանցվել, ավելի քան 10%»,- ընդգծեց նա:
Ինչ վերաբերում է պետական պարտքին, ապա դրա չափը, ըստ փորձագետի, կգերազանցի 9 միլիարդ դոլարը:
Բոստանջյանը հիշեցրեց, որ կառավարությունը 750 միլիոն դոլարի չափով եվրապարտատոմսեր է թողարկել, եւ դա նույնպես պարտք է:
«Մենք արդեն համակերպվել ենք պարտքի հետ, բայց խնդիրն այն է, որ փողը գնում է ընթացիկ ծախսերը հոգալու համար, մինչդեռ պարտքի ինստիտուտը նախատեսված է կապիտալ ծրագրերի իրականացման միջոցով գործունեության նոր տեսակներ ստեղծելու համար»,- բացատրեց նա:
Հիշեցնենք, որ փետրվարի 4-ին ՀՀ ֆինանսների նախարար Ատոմ Ջանջուղազյանը լրագրողների հետ զրույցում ասել էր, որ երկրի ազգային պարտքի չափը կարող է մոտենալ 8,9 միլիարդ դոլարի: Նա հավելել էր, որ 2021 թվականին Հայաստանում կանխատեսվում է 3,2% տնտեսական աճ։
