«Պիտի ապրենք, արարենք, պայքարենք՝ հանուն կյանքի, հանուն սիրո ու խաղաղության»․ Արցախի երեխաներն երգի տեսքով աշխարհին խաղաղության կոչ են հղել: Հեղինակը կոմպոզիտոր Էդգար Գյանջումյանն է, ով Tert.am-ի հետ զրույցում պատմել է՝ վերցրել է այն բոլոր հույզերն ու ապրումները, որ սեպտեմբերի 27-ին Ադրբեջանի սանձազերծած պատերազմի օրերին ունեցել և շարունակում են ունենալ աշխարհի հայերը, ու դրանք վերածել մեղեդու, որ «աղավնու պես թռչեն, հասնեն մարդկանց սրտերին»։
Խոսքերը գրել է Ասկերանի միջնակարգ դպրոցի փոխտնօրեն Աիդա Գյանջումյանը: Սա նրա առաջին փորձն է: Արցախում թողնելով ընտանիքի տղամարդկանց՝ որդուն, ամուսնուն, փեսային, փորձել է ինչ-որ մի բան անել իր երկրի համար. ինչպես ինքն է ասում՝ նայել է անմեղ փոքրիկներին ու մտահղացել խաղաղության երգ ստեղծել: Անկեղծացել է՝ կոմպոզիտոր Գյանջումյանն իրականացրել է իր երազանքը: Նա ոչ միայն անմիջապես ոգևվորվել է այդ գաղափարով, այլև ամեն ինչ արել է, որ իրենց համագործակցության արդյունքում ստեղծված երգը ձայնագրվի և տեսահոլովակ ունենա: Աիդա Գյանջումյանը խոստովանել է՝ խոսքերի վերջնական տարբերակում կա նաև Էդգար Գյանջումյանի ձեռագիրը:
Երգի կատարման համար տեղում ստեղծվել է մանկական երգչախումբ, որոնց մեծ մասը Ադրբեջանի զինուժի ռմբակոծությունից փրկված ու Երևան հասած երեխաներն են: Էդգար Գյանջումյանը նրանց մասին խոսելիս՝ շեշտել է, որ երբ երեխաների շուրթերից արդեն պատրաստի ստեղծագործությունը լսել է, անհավանական տպավորություն է ունեցել՝ կարծես կոչ-երգը հենց փոքրիկների սրտի խոսքն էր։
Տեքստը թարգմանել են Մինսկի խմբի համանախագահող երկրների լեզուներով ու տեղադրել համացանցում, իսկ տեսահոլովակը պատրաստվել է լրատվականների պատրաստած ռեպորտաժների կադրերով:
Մանրամասները՝ տեսանյութում։
