Այսօր «Վալդայ» ակումբում իր ելույթի ժամանաք Ռուսաստանի նախագահ Վլադիմիր Պուտինը անդրադադձավ արցախրան հակամարտությանը։

Նա նշեց, որ արցախյան հակամարտությունը սկսվեց հայ ժողովրդի նկատմամբ անցյալում թույլ տված դաժան հանցագործություններից։ «Լեռնային Ղարաբաղի հակամարտությունը հայկական կողմի և Ադրբեջանի միջև ի սկզբանե կրել է էթնիկ հակամարտության  բնույթ և սկսվել է հայ ժողովրդի նկատմամբ դաժան հանցագործություններից: Այս հակամարտությունը ի սկզբանե չի կրել միջպետական կամ տեռորիզմի դեմ պայքարի բնույթ, այն սկսվել է էթնիկ հակազդեցությունից: Ցավոք, դա փաստ է, որ Սումգայիթում ապա բուն Լեռնային Ղարաբաղում հայ ժողովրդի հանդեպ տեղի ունեցան դաժան հանցագործություններ: Եվ մենք այս ամենը համալիր պետք է հաշվի առնենք»,- ընդգծել է Ռուսաստանի առաջնորդը:

Պուտինն իր խոսքում  նաև ասաց, որ չի մոռացվել հայ ժողովրդի ապրած ողբերգությիւնը Առաջին համաշխարհային պատերազմի ժամանակ։

Անդրադառնալով Արցախում ստեղծված իրավիճակին ՌԴ նախագահն ընդգծեց՝ Թուրքիայի և Ռուսաստանի մոտեցումները արցախյան հարցում չեն համընկնում։ «Թուրքիան չի ճանաչում Լեռնային Ղարաբաղը, չի ճանաչում Ղրիմը…»,- Թուրքիայի նախագահ Էրդողանի խոսքերը Ուկրաինայի առաջնորդ Զելենսկու հետ հիշեցրեց Պուտինը։

Միևնույն ժամանակ նա նշեց, որ Ռուսաստնը Հայաստանին ու Ադրբեջանին վերաբերվում է որպես հավասար դաշնակիցների։ «Ռուսաստանը կոնֆլիկտում այնպիսի դիրքորոշում ունի, որը հնարավբրություն է ընձեռում բոլոր կողմերի վստահությունը ունենալ»,- հավաստել է նա՝ հավելելով, որ ոչ ոք Ռուսաստանի չափ շահագրգռված չէ խնդրի կարգավորման մեջ։
Պուտինը հավելեց, որ Լեռնային Ղարաբաղում ներկայիս հակամարտությունում երկկողմ զոհերի ընդհանուր թիվը մոտենում է 5 հազարի։ Նա նշեց, որ շատ է ցանկանում փոխզիջման տարբերակներ գտնել Ղարաբաղի հարցով, և օրվա ընթացքում մի քանի անգամ զրույցներ է ունենում ՀՀ վարչապետ Նիկոլ Փաշինյանի հետ: