Դատարանում մեղադրանքը պետք է պաշտպանի գլխավոր դատախազ Արթուր Դավթյանը։ Պահանջում է կաշառք վերցնելու մեջ մեղադրվող նախկին դատավոր Իշխան Բարսեղյանը:
«Չեմ ուզում լիրիկական զեղումներ թույլ տալ, սակայն ասեմ, եղբա՛յր, օրենքով բռնել եք, օրենքով դատեք»,- այսօր դատարանում նշեց նախկին դատավորը:
Գլխավոր դատախազի կողմից տրված լիազորագրով դատարան ներկայացած դատախազ Կարեն Բիշարյանին նա պատշաճ մեղադրող չհամարեց եւ նրա լիազորությունները դրեց կասկածի տակ:
«Ուղղակի հակաօրինական է եւ ապօրինի նրա եւ ցանկացած այլ դատախազի մասնակցությունը, որպես մեղադրողի»,- ավելացրեց Իշխան Բարսեղյանը:
Իսկ դատախազ Կարեն Բիշարյանը պարզաբանեց. «Դատական օրենսգրքով նման երաշխիք ամրագրված չէ, որ դատավորի վերաբերյալ մեղադրանքը պարտադիր պետք է պաշտպանի գլխավոր դատախազը»:
Այս գործով դատական նիստերը բավականին երկար ժամանակ չէին կայանում, քանի որ գործը քննող դատավորը տեղափոխվել էր այլ դատարան:
Չնայած ամբաստանյալի պահանջին՝ նորանշանակ դատավոր Վաչե Մարգարյանը որոշեց շարունակել դատական նիստը, որի ժամանակ մեղադրողը ընթերցեց մեղադրական եզրակացությունը։
Շենգավիթ վարչական շրջանի ընդհանուր իրավասության դատարանի նախկին դատավոր Իշխան Բարսեղյանը մեղադրվում է խոշոր չափերով՝ 1000 ԱՄՆ դոլարին համարժեք դրամի չափով կաշառք վերցնելու մեջ։ Փաստաբան Էլզա Զաքարյանին էլ մեղադրանք է առաջադրվել կաշառքի միջնորդության համար։ Ի տարբերություն դատավորի՝ Էլզա Զաքարյանը ընդունեց իր մեղադրանքը։
Նիստը կշարունակվի ապրիլի 28-ին:
