Լոնդոնի «Արսենալի» կիսապաշտպան Հենրիխ Մխիթարյանը չի մասնակցի «Չելսիի» դեմ ֆուտբոլի Եվրոպայի լիգայի եզրափակիչի հանդիպմանը, որը տեղի կունենա մայիսի 29-ին Ադրբեջանի մայրաքաղաք Բաքվում, հաղորդում է ակումբի կայքը:
«Արսենալի» հայտարարությունում նշված է, որ այդ հարցը քննարկվել է Հայաստանի հավաքականի ավագի եւ նրա ընտանիքի հետ:
Մխիթարյանը ավելի ուշ սոցկայքերում մեկնաբանել է այդ որոշումը։
«Քննարկելով բոլոր տարբերակները՝ մենք ստիպված էինք բարդ որոշում ընդունել Եվրոպայի լիգայի եզրափակիչին չմեկնելու վերաբերյալ: Այսպիսի հանդիպում հաճախ չի լինում մեր՝ ֆուտբոլիստներիս կյանքում, եւ ես պետք է խոստովանեմ, որ շատ եմ ցավում այն բաց թողնելու համար: Կերկրպագեմ իմ թիմակիցներին: Եկե՛ք գավաթը տուն բերենք»,- սոցցանցերում գրել է Մխիթարյանը:
