«Հայաստանը միարժեքորեն պատրաստ է կնքել «խաղաղության պայմանագիրը», և Ադրբեջանի կողմից հնչեցված մտքերը որպես նախապայման չեմ դիտարկում։ Կառավարությունը պատրաստ է կնքել «խաղաղության պայմանագիրը»»,- կառավարության նիստից հետո ճեպազրույցում ասաց արդարադատության նախարար Սրբուհի Գալյանը:
Նա նշեց, որ խաղաղությունն այլընտրանք չունի, և իրենց մեր գործողությունները պետք է միտված լինեն խաղաղության վերջնական հաստատմանը. «Թե ինչ կոնցեպտով պետք է առաջ շարժվենք դեպի խաղաղության պայմանագրի կնքումը, կարծում եմ, շատ շուտով հանրությանը հայտնի կլինի»։
Անդրադառնալով Սահմանադրության փոփոխություններին՝ Ս.Գալյանն ասաց. «Մենք աշխատում ենք Սահմանադրության նոր տեքստի վրա: Այս պահին տեքստի մասով մանրամասներ ասել չեմ կարող։ Բայց այդ տեքստը չի լինելու և ի բնե չի կարող լինել գաղտնի, ինչ-որ պահի հանրայնացվելու է, և յուրաքանչյուր կետ, յուրաքանչյուր նորմ քննարկվելու է մեր հասարակության ներկայացուցիչների հետ»:
Հարցին՝ հաշվի առնելով այն նախապայմանները, որ առաջ է քաշում Ադրբեջանի նախագահը, հնարավո՞ր է՝ իշխանությունն արագացնի Սահմանադրության փոփոխության հարցը, նախարարը պատասխանեց. «Չեմ կարծում, որ հնարավոր է նոր Սահմանադրության տեքստ ունենալ 8-10 ամսից ավելի շուտ»:
