Փարիզում անցկացվող 33-րդ ամառային Օլիմպիական խաղերում օգոստոսի 7-ին պայքարի մեջ մտավ հունահռոմեական ոճի ըմբշամարտի Հայաստանի թիմի վերջին ներկայացուցիչ Սլավիկ Գալստյանը:
Աշխարհի բրոնզե մեդալակիր, Եվրոպայի կրկնակի բրոնզե մեդալակիրը 67 կգ քաշայինների 1/8 եզրափակիչում ծանր գոտեմարտում 3:2 հաշվով հաղթեց Պանամերիկյան խաղերի կրկնակի չեմպիոն, Պանամերիկյան առաջնության եռակի հաղթող, Էկվադորի ներկայացուցիչ Անդրես Ռոբերտո Մոնտանյո Արոյոյին:
Առաջին մրցափուլի մեկնարկում Սլավիկ Գալստյանը պարտերում աշխատելու հնարավորություն ստացավ եւ իրար հաջորդող գլորումներով հաշիվը դարձրեց 7:0: Եւս երկու միավոր վաստակելուց հետո, երբ արդեն պետք է կանգնեցվեր գոտեմարտը Սլավիկի հաղթանակով, Էկվադորի ներկայացուցիչի մարզիչը բողոքարկեց: Մրցավարները բավարարեցին եւ Սլավիկ Գալստյանի հաշվից 8 միավոր հանեցին: 1:0 հաշվից հետո Սլավիկ Գալստյանը երկու միավոր վաստակեց: Մրցակիցները գնացին հանգստի 3:1 հաշվով:
Երկրորդ մրցափուլում գորգի մրցավարը հայ ըմբիշին պասիվություն տվեց, բայց մրցակիցը չկարողացավ հնարք կատարել: Մինչեւ գոտեմարտի ավարտը աշխարհի բրոնզե մեդալակիրը թույլ չտվեց մրցակցին առաջ անցնել հաշվի մեջ:
Սլավիկ Գալստյանը դուրս եկավ քառորդ եզրափակիչ։
Տեսանյութն՝ այստեղ
