Human Rights Watch միջազգային իրավապաշտպան կազմակերպության Եվրոպայի և Կենտրոնական Ասիայի բաժնի տնօրեն Գիորգի Գոգիան իր մտահոգություններն է հայտնել Լեռնային Ղարաբաղում առկա հումանիտար իրավիճակի հետ կապված:
«Արմենպրես»-ի հաղորդմամբ՝ Գիորգի Գոգիան «Թվիթեր»-ում նշել է, որ երկու շաբաթվա ընթացքում սառնամանիքի պայմաններում Լեռնային Ղարաբաղի բնակիչները 2-րդ անգամ մնացել են առանց ջեռուցման, որովհետև գազատարի մի հատվածն անցնում է Ադրբեջանի կողմից վերահսկվող տարածքով:
«Հացաբուլկեղենի շատ խանութներ չեն աշխատում, ինչը կարող է հացի սուր պակասի պատճառ դառնալ: Գազի անջատումն անդրադառնում է նաև ուսումնական հաստատությունների՝ մանկապարտեզների և դպրոցների գործունեության վրա։ Դրանք մնում են փակ, քանի որ չեն ջեռուցվում: Շտապ քայլեր են անհրաժեշտ հետագա հումանիտար ճգնաժամից խուսափելու համար»,-նշել է նա:
