Մեծ Բրիտանիայում հայտնաբերված կորոնավիրուսի նոր տեսակն ավելի արագ է տարածվում: Այս մասին ասվում է Անգլիայի գլխավոր բժիշկ, պրոֆեսոր Քրիս Ուիթիի հայտարարության մեջ:
Անգլիայի հարավ-արևելքում ավելացել է վարակակիների թիվը, նոր և զարգացող շնչառական վիրուսային սպառնալիքների վերաբերյալ խորհրդատվական կոմիտեն բնակիչներին խորհուրդ է տվել ավելի զգույշ լինել:
«Մենք նախազգուշացրել ենք Առողջապահության համաշխարհային կազմակերպությանը և շարունակում ենք վերլուծել առկա տվյալները: Դեռևս ապացույց չկա, որ նոր տեսակի վիրուսն ավելի բարձր մահացություն է առաջացնում, կամ որ այն ազդում է պատվաստանյութերի և բուժման վրա, բայց դրա հաստատման համար անհետաձգելի հետազոտություններ են անցկացվում»,- նշել է Ուիթին:
Կորոնավիրուսային նոր տեսակի վիրուսի մասին նոր տվյալներ ստանալուց հետո Մեծ Բրիտանիայի վարչապետ Բորիս Ջոնսոնը կառավարության նիստ է հրավիրել:
Մեծ Բրիտանիայի կառավարությունը Լոնդոնում և Անգլիայի հարավ-արևելքի մի շարք տարածաշրջաններում կորոնավիրուսի արագ տարածման պատճառով սահմանափակումների նոր, ամենաբարձր ՝ չորրորդ մակարդակ է սահմանել:
