ԵՊԲՀ ռեկտոր Արմեն Մուրադյանը Ֆեյսբուքի իր էջում գրում է.
««Մերօրյա հերոսները». Աղաջան Ջանոյան
ԵՊԲՀ «Մերօրյա հերոսները» շարքի շրջանակում խորը ցավով ենք անցյալ ժամանակով խոսում շուրջ երեք տասնյակ համալսարանականի մասին: Նրանք իրական հերոսներ են, որոնք ապրել են մեր կողքին ու կյանքը զոհել հանուն մեր խաղաղ օրերի:
Ստոմատոլոգիական ֆակուլտետից ևս մեկ սովորող՝ Աղաջան Ջանոյանը, զոհվել է ադրբեջանական ագրեսիայի դեմ հայրենիքի պաշտպանության համար մղված մարտերում։ Աղաջանին կուրսընկերներն ու ֆակուլտետի աշխատակիցները բնորոշում են որպես կարգապահ, խելացի, համեստ երիտասարդի:
«Չէինք կարող չնկատել նրա բարի, դրական և ընկերասեր վերաբերմունքը բոլորի հանդեպ»,- ասում է համակուրսեցին՝ Լաուրա Սողոմոնյանը։
Աղաջան Ջանոյանն ամռանն է զորակոչվել բանակ: Մեծ էր ապագա ստոմատոլոգի ցանկությունը վերադառնալ զինվորական ծառայությունից և շարունակել ուսումնառությունը՝ կարճ ժամանակահատվածում հարազատ դարձած համալսարանում:
«Միշտ բավականին վաղ էր գալիս համալսարան ու նստում ընթերցասրահում, շատ էր սիրում տարբեր տեսակի, այդ թվում մարտական խաղեր խաղալ»,- նշում է դասընկերուհին՝ Միլենա Մելքումյանը:
Կուրսընկերուհիները փաստում են, որ Աղաջանը չափազանց դրական կերպար էր, միշտ լավ տրամադրություն ուներ և փորձում էր դրականը տարածել նաև շրջապատում: Դժվար իրավիճակներում էլ փորձել է լավատես լինել և արժանապատվությամբ հաղթահարել:
Պատերազմում անմահացած զինվորը ծնվել էր 2002 թվականին Վայոց ձորի մարզի Ազատեկ գյուղում: Աղաջանը ծառայել է Մարտակերտում, զոհվել է Ներքին Հոռաթաղ գյուղում, արկի պայթելու հետևանքով:
Տղանե՛ր, խոնարհվում ենք Ձեր հիշատակի առաջ»:
