Սիրիայից վարձկանների նոր խումբը պատրաստվում է Թուրքիայով Լեռնային Ղարաբաղի հակամարտության գոտի մեկնել, հայտնում է «ՌԻԱ Նովոստի» գործակալությունը՝ վկայակոչելով սիրիական ընդդիմությունում իր աղբյուրներին։
Զինյալների թվի և մեկնման ժամկետի մասին տեղեկություն չկա։
Աղբյուրների փոխանցմամբ՝ այնտեղ տեղափոխված զինյալներն արդեն իսկ մեծ կորուստներ են կրում․ վերջին օրերին Թուրքիա է տեղափոխվել 18 վիրավոր և 7 դի:
Միևնույն ժամանակ աղբյուրները հերքել են զինյալների՝ Լեռնային Ղարաբաղից Սիրիա վերադառնալու մասին տեղեկությունները՝ նշելով, որ նման պայմանագրերը կես տարի ժամկետով են կնքվում։
«Սիրիայից մեկնած ոչ մի զինյալ չի վերադարձել Լեռնային Ղարաբաղից»,- նշել է գործակալության զրուցակիցներից մեկը և հավելել, որ զինյալներն այնտեղ են տեղափոխվել դեռևս հունիսից։
«Փոխանակման ժամանակը դեռևս չի եկել, քանի որ դա ամեն վեց ամիսը մեկ է տեղի ունենում»,- նշել է աղբյուրը։
Ավելի վաղ Սիրիայի նախագահ Բաշար ալ Ասադը և Ռուսաստանի արտաքին հետախուզական ծառայության ղեկավար Սերգեյ Նառիշկինը հայտնել էին, որ Թուրքիան Սիրիայից և այլ երկրներից զինյալներ է տեղափոխվում Լեռնային Ղարաբաղի հակամարտության գոտի՝ այնտեղ ծավալվող մարտերին մասնակցելու համար։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 14-ի դրությամբ Արցախի զինուժը խոցել է հակառակորդի՝ 16 ուղղաթիռ, 19 ինքնաթիռ, 176 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5489 զոհ։ Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 31 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։
