Սեպտեմբերի 27-ին Ադրբեջանը ԼՂ-ում վերսկսել է պատերազմական գործողությունները՝ քաղաքացիական օբյեկտների նկատմամբ իրականացնելով անխնա կասետային ռմբակոծություններ և Ստեփանակերտը վերածելով ավերակների։ Հայաստանում հազարավոր կամավորներ մեկնել են ռազմաճակատ՝ այս մարտն անվանելով «գոյամարտ», գրում է National Review-ն՝ նշելով, որ ընդամենը երկու շաբաթվա ընթացքում բախումներն արդեն վերաճել են 21-րդ դարի խոշորագույն ռազմական բախումներից մեկին։
Հոդվածագիրներ Հակոբ Տողրամաջյանը և Քեթլին Բեյլին նշում են, որ ԱՄՆ արտաքին քաղաքականության գծով «իսթեբլիշմենթի կարևոր ձայները» պնդում են, որ «Ադրբեջանը «մեր թիմում է» և դեմ է Իրանին ու Ռուսաստանին, ուստի մենք պետք է երկրպագենք նրա հաջողության համար։ Սա «անհերքելի աշխարհաքաղաքական մաթեմատիկա է»։
Հոդվածագիրների խոսքով՝ ԱՄՆ-ի աջակցությունը Ադրբեջանին բարձր խաղադրույքներ և իրական հետևանքներ ունի։ Իրանի հետ հարաբերություններում աճող լարվածության ֆոնին 2020 ֆինանսական տարում Թրամփի վարչակազմն Ադրբեջանին ավելի քան 100 մլն դոլարի ռազմական օգնություն է հատկացրել՝ զգալիորեն ավելի շատ, քան տարածաշրջանի ցանկացած այլ երկրի:
«Այս միջոցները վստահվել են Ադրբեջանում Ալիևի տխրահռչակ կոռումպացված ռեժիմին, որը գրեթե երեք տասնամյակ իշխանության ղեկին է՝ կուտակելով նավթային հարստություններ, հրահրելով հակահայկական շովինիզմ, ոչնչացնելով մամուլի ազատությունը և կատարելագործելով դաժան ռեպրեսիվ մեթոդները։ Մինչ նախագահ Իլհամ Ալիևը արևմտյան զրուցակիցներին կախարդում է իր ցուցադրական բարյացակամությամբ և շռայլ հյուրընկալությամբ, իր տան ներսում նա մեկ այլ ապշեցուցիչ տոնով է խոսում նրանց մասին։ Ինչպես փաստագրել է ադրբեջանցի քաղաքագետ Ալթայ Գոյուշովը, Ալիևի ռեժիմի բարձրաստիճան անդամները պարբերաբար և հրապարակայնորեն մեղադրում են Միացյալ Նահանգներին ահաբեկչությանն աջակցելու համար՝ «ժողովրդավարության համար պայքարող ակտիվիստներին որակելով դավաճաններ, որոնք ծառայում են արևմտյան իմպերիալիստների շահերին»,- գրում են հոդվածագիրները։
Անդրադառնալով ԼՂ հակամարտությանը Թուրքիայի մասնակցության, հոդվածի հեղինակները վերահաստատում են, որ Թուրքիայի միջոցով Ադրբեջան են մեկնել ջիհադականներ՝ քրիստոնյա հայերի դեմ կռվելու համար։
«Չունենալով Ադրբեջանի աջակցության համար համոզիչ աշխարհաքաղաքական պատճառներ՝ Միացյալ Նահանգները պետք է հաշվի առնի Հայաստանի խոցելիությունը, ժողովրդավարական առաջընթացը և ինքնորոշման իրավունքը։ Հայաստանին աջակցելը ոչինչ չի արժենա. դա կխնայի հարյուր միլիոնավոր դոլարներ, որոնք մենք հիմա ամեն տարի ուղարկում ենք Բաքու»,- ասված է հոդվածում։
