Անգլիական «Լիվերպուլի» և Էստոնիայի հավաքականի ֆուտբոլիստ Ռագնար Կլավանը Հայաստանի հավաքականի հետ Երևանում անցկացրած ընկերական խաղից հետո լրագրողների հետ զրույցում կիսվել է տպավորություններով:
Հանդիպումը, հիշեցնենք, ավարտվել է ոչ-ոքի՝ 0:0 հաշվով.
«Կարծում եմ՝ երկու թիմն էլ գոլային որոշ պահեր ունեցավ, կասեմ, որ դարպասապահներն ու պաշտպաններն այսօր, իսկապես, լավ էին խաղում:
Կարծում եմ՝ ոչ-ոքին արդարացի արդյունք է այս խաղի համար: Արդյոք սպասելիքներս արդարացա՞ն. և՛ այո, և՛ ոչ: Որպես էստոնացի՝ ես միշտ ցանկանում եմ, որ մեր ընտրանին հաղթի: Կարծում եմ՝ հաղթելու ցանկությամբ էին խաղին մոտեցել նաև հայերը»,- լրագրողների հետ զրույցում նշեց Կլավանն ու կարծիք հայտնեց նաև Հայաստանի հավաքականի կիսապաշտպան Հենրիխ Մխիթարյանի մասին.
«Երբ ես հանդես էի գալիս Գերմանիայում, Մխիթարյանը «Բորուսիայի» խաղացող էր: Ես նրա մեծ երկրպագուն եմ: Նա իսկապես շատ մեծ որակներ ունի»:
Հիշեցնենք՝ Էստոնիայի հավաքականի ավագը 2012-16 թվականներին հանդես է եկել «Աուգսբուրգի» կազմում:
