ԱԺ նախկին պատգամավոր Միհրան հակոբյանը գրում է.
«Անուղղելի սուտասան Նիկոլի ուսապարկերը մանտրայի պես կրկնում են, թե ի տարբերություն նախորդ իշխանությունների՝ Նիկոլի օրոք մարդկանց բռնության չեն ենթարկում, չեն ծեծում, չեն սպանում… Անշուշտ, Նիկոլի ղեկավարությամբ այս դատարկախոսության հեղինակները հիշողության, տրամաբանության ու բարոյականության հետ կապված խնդիրներ ունեն: Չի բացառվում նաև, որ հոգեխանգարման խնդիրներ ունեն:
Միայն թե բնության մեջ գոյություն չունի մի իրավական կարգավորում, որը կստիպի պատմությանը մոռանալ Հայաստանի, Արցախի ու հայ ժողովրդի գլխին պատուհասների իշխանության բերած զուլումն ու վայիսը: Ոչինչ չի մոռացվել, ոչ մեկը չի մոռացվել, իսկ պատմության դատաստանին մատների արանքով նայողները, հավատացեք, երբեք ու երբեք չեն պլստացել ոչ մի երկրում, ոչ մի հասարակությունում:
Ինչ վերաբերվում է Նիկոլի ռեժիմի ժամանակ «բռնություն չլինելուն», ապա գուցե իրենք են «մոռացել», բայց պատմությունը չի մոռացել, որ Նիկոլի ռեժիմի ժամանակ բանտում մահացել են (գուցե և սպանվել) ապօրինի կալանավորված լրագրող Մհեր Եղիազարյանը և հանրային գործիչ Արմեն Գրիգորյանը (ուղիղ եթերում), Նիկոլի շարասյունը վրաերթի է ենթարկել ու սպանել հղի Սոնա Մնացականյանին: Այս այլանդակությունները տեղի են ունեցել Նիկոլի ռեժիմի օրոք ու պատմությունը սա չի մոռացել:
Ի դեպ, 4 տարի առաջ Նիկոլի ռեժիմի օրոք՝ 2021-ի հունիսի 22-ին, տանս դիմաց կայանված մեքենաս նռնակով պայթեցվել է: Ինձ հարցաքննող իրավապահների հարցին, թե ում եմ կասկածում, ասել եմ՝ Նիկոլին: Ու նաև ասել եմ՝ քանի Նիկոլը վարչապետի աթոռին է, դուք այս գործը չեք բացահայտելու: Այդպես էլ եղավ՝ պայթյունից 4 տարի անց Նիկոլի ոստիկանությունը, դատախազությունն ու քննչականը ասելիք չունեն: Ես անսպառ համբերություն ունեմ ու համոզված եմ, որ հեռու չէ օրը, երբ պատվիրատուն էլ, կատարողներն էլ, գործը պարտակողներն էլ ջրի երես են դուրս գալու և հնձելու են այն, ինչ ցանել են»։
