Մարտ ամիսը, ինչպես և կանխատեսվել էր, հանրապետության ողջ տարածքում եղել է բավականին տաք, օդի ամսական կլիմայական ջերմաստիճանը նորմայից բարձր է եղել՝ 2-4 աստիճանով, իսկ տեղումների քանակը բաշխվել է խիստ անհամաչափ, հրավիրված ասուլիսի ժամանակ հայտարարեց Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը։
«Ապրիլ ամսվա համար կանխատեսվում է, որ օդի ամսական կլիմայական ջերմաստիճանը նորմայից բարձր կլինի 1-2 աստիճանով, իսկ տեղումների քանակը կլինի նորմայի սահմաններում։ Մեզ սպասվում է տաք և բավարար տեղումներով ապրիլ։
Սակայն, չի բացառվում նաև, որ ապրիլ ամսվա վերջին օրերին ունենանք ցուրտ հոսանքներ։ Ապրիլին մենք կունենանք բավականաչափ տեղումներ»,-ավելացրեց նա։
Սուրենյանը հավելեց՝ մինչև ապրիլի 8-ը ներառյալ հանրապետությունում լուրջ ցիկլոնների ներթափանցում չի կանխատեսվում, իսկ 9-13-ին հանրապետության որոշ հատվածներում ժամանակ առ ժամանակ կլինեն տեղումներ։
