Կառավարությունը հաստատեց Հայաստանի Հանրապետության կառավարության ծրագրի (2021-2026 թթ.) 2024 թվականի կատարման ընթացքի և արդյունքների մասին զեկույցը։
Այն կներկայացվի Ազգային ժողով։
Վարչապետ Նիկոլ Փաշինյանն ասաց, որ զեկույցը ամենայն մանրամասնությամբ կքննարկեն ԱԺ-ում, բայց կառավարությունում մի քանի անդրադարձ կատարեց։
Փաշինյանի խոսքով՝ 2024 թվականի արդյունքներով՝ Հայաստանի Հանրապետության համախառն ներքին արդյունքը (ՀՆԱ) ընթացիկ գներով կազմել է ավելի քան 10,1 տրլն ՀՀ դրամ՝ նախորդ տարվա համեմատ աճելով 5,9%-ով։
«2021 թվականի խորհրդարանական ընտրություններում մեր սահմանած նպատակադրումը եղել է տարեկան միջինում 7 տոկոս տնտեսական աճ ապահովելը։ 2021 թվականին ապահովվել է 5,8 տոկոս տնտեսական աճ, 2022-ին՝ 12,6 տոկոս տնտեսական աճ, 2023-ին՝ 8,3 տոկոս, հետևաբար, մեր նպատակային ցուցանիշը ապահովված է»,- ասաց նա։
Փաշինյանը նշեց, թե 2024 թվականի միջին տարեկան արդյունքներով՝ ՀՀ-ում աշխատողների թվաքանակը կազմել է 760 555 մարդ։ Այս ցուցանիշը, 2018 թվականի նույն ժամանակահատվածի համեմատությամբ, ավելի է 203 878 մարդով կամ 36,6 %-ով, իսկ 2023 թվականի նույն ժամանակահատվածի համեմատ՝ 37 882-ով կամ 5,2 %-ով:
2024 թվականի արդյունքներով՝ տարեկան միջին ամսական անվանական աշխատավարձը կազմել է 287 172 ՀՀ դրամ` 2018 թվականի համեմատ աճելով 114 445 ՀՀ դրամով կամ 66,3 %-ով, իսկ 2023 թվականի համեմատ՝ 17 178 ՀՀ դրամով կամ 6,4%-ով:
Հայաստանում գնաճը 2018 թվականի նկատմամբ եղել է 25,3 տոկոս, իսկ 2023-ի նկատմամբ եղել է 0,3 տոկոս։
«Գնաճը տնտեսական աճի պարտադիր ուղեկիցն է»,- նշեց վարչապետը։
Փաշինյանը հայտարարեց, որ 2018-ից մինչև 2024 թվականը ներառյալ Հայաստանի տնտեսությունն աճել է 43,5 տոկոսով։
«Սա ահռելի աճ է, սա նշանակում է, որ մենք տարեկան միջինում 6,1 տոկոսից ավելի տնտեսական աճ ենք ապահովել»,- ասաց նա։
Վարչապետը գործադիրի բոլոր անդամներին շնորհակալություն հայտնեց կատարած աշխատանքի համար։
«Հայաստանը շարունակում է գտնվել կայուն տնտեսական զարգացման ուղեծրի վրա»,- հավելեց նա։
