«Ինտերի» մարզական տնօրեն Պիերո Աուսիլիոն պատասխանել է այն հարցին, թե արդյոք միլանյան ակումբը նախատեսում է ուժեղացնել հարձակման գիծը ձմեռային տրանսֆերային պատուհանի ժամանակ։
«Մենք բացարձակապես գոհ ենք մեր հարձակվողներից, չորս հարձակվող ունենք: Մենք մեր թիմում ունենք նաև այնպիսի ուժեղ խաղացող, ինչպիսին Մխիթարյանն է, ով իր կարիերայի ընթացքում հաճախ է հանդես եկել հարձակվողի դիրքում։ Անհրաժեշտության դեպքում նա հասանելի կլինի հինգերորդ հարձակվողի դիրքում»,- Աուսիլիոյի խոսքերն է մեջբերում Inter Xtra-ն։
Աուսիլիոն խոսել է նաև հարձակվող Լաուտարո Մարտինեսի և կիսապաշտպան Հենրիխ Մխիթարյանի նոր պայմանագրի մասին։
«Այս պահին դա ժամանակի հարց է, ոչ թե ցանկության։ Ակումբը ցանկանում է երկարաձգել նրանց հետ աշխատանքային պայմանագիրը։ Ֆուտբոլիստներն իրենց հերթին մտադիր են շարունակել հանդես գալ մեր թիմում»,- ասել է Աուսիլիոն:
Հիշեցնենք, որ Մխիթարյանը «Ինտեր» է տեղափոխվել 2022 թվականի ամռանը «Ռոմայից»:
