«Եռակողմ համաձայնագրում չկա ամենագլխավորը՝ Լեռնային Ղարաբաղի կարգավիճակի հարցը, թեև Ռուսաստանի ղեկավարության հետագա հայտարարություններում ասվեց, որ հարցը մնացել է բաց, և այն պետք է քննարկվի հետագայում:
Բանակցային փաստաթղթերում, որոնք քննարկվել են Մադրիդյան սկզբունքներով, Կազանում, դրան հաջորդած բանակցային գործընթացում Արցախի միջանկյալ կարգավիճակի հարցն է, որքանով համանախագահները կկարողանան շարունակել բանակցությունները այս միջանկյալ կարգավիճակի շուրջ, ի՞նչ է սպասվում Լեռնային Ղարաբաղին, ո՞վ է այն ղեկավարելու, որովհետև բոլոր բանակցային փաստաթղթերում եղել են այն դրույթները, որ միջանկյալ կարգավիճակի դեպքում Արցախում կձևավորվեն իշխանության բոլոր ճյուղերը՝ դատական, գործադիր, օրենսդիր, ուժային համակարգերը, ՏԻՄ կառույցներ:
Արցախը հնարավորություն կունենա արտաքին հարաբերություններ կառուցել, իրավունք կունենա մասնակցել միջազգային կառույցների աշխատանքին, եթե այդ միջանկյալ կարգավիճակը չխոչընդոտի, կստանա ուղղակի միջազգային ֆինանսական ներդրումներ և հասանելիություն դեպի արտաքին շուկաներ, և ամենակարևոր հարցն այդ միջանկյալ կարգավիճակի դեպքում անվտանգության ապահվոման հարցն է»,- խոսելով նոյեմբերի 9-ին կնքված եռակողմ համաձայնագրի մասին՝ ասել է ՀՀ նախկին ԱԳ նախարար Էդվարդ Նալբանդյանը։
Նա նշել է, որ այդ կարևոր ու առանցքային կետին նշված համաձայնագրում անդրադարձ չկա:
